Eksena sa Bataan Death March:

Wala nang sasarap pa sa tubig na titighaw sa nanunuyong lalamunan. Ipagpapalit niya ang lahat ng ari-arian sa isang basong malamig na tubig. Matitiis ang gutom pero hindi ang uhaw sa gitna ng impiyernong ito. Maya-maya, sinenyasan silang magpatuloy na sa paglakad. Lugami ang hukbong kinabibilangan ni Nato. Sa isang bakod ng alambreng tinik sa gilid ng daan, may karimarimarim na tagpo. Hindi agad makilala kung ano iyon buhat sa limampung metrong layo, ngunit habang papalapit hindi maipagkakamaling sundalong Filipino ang nakasabit doon. Nakasampay ang nakadipang mga kamay sa alambre at halatang inilagay talaga sa ganoong puwesto. Bangas ang mukha ng lalaki. Natuyo na ang dugo sa mga pisngi. Ngunit higit na matitilihan ang sinuman sa wakwak na sikmurang nakalantad sa lahat. Itinarak ang bayoneta sa gitna ng katawan at itinikwas pataas ang talim. Nagkasabog-sabog ang laman-loob na nakaluwa sa harap ng lungayngay na bangkay. Nakadapo ang sandamakmak na langaw sa bituka. Nang tingnan ni Nato ang ibabang bahagi ng katawan, wala doon ang mga binti at hita ng lalaki.

Mula sa Bataan Uncensored, Lt. Miller, US Army